Na gita al Santo di Pietro Gattolin

Una bella poesia del nostro poeta dialettale PIETRO GATTOLIN –

NA GITA AL SANTO

“Seto, Toni, el prete el ga organizà na gita al Santo de Padoa! Có semo rivà a so’ restà inmagà!

No te digo, el tran che’l faséa on bordèo cofà el demonio, pałassi dapartuto porteghi e cese, na fumara de gente, na confusion da mati. Mi a jera senpre tacà al tabaro de me pare, senò a me perdéa: e chi che catava la strada de vegnere a casa? In cesa al Santo a no te digo? Na calca!

Mi ca jera picoleto a no go visto gnente, mi no sò cossa ca sia

‘ndà a fare! A mezodi a semo ‘ndà a magnare queo ca se ghévimo portà via da casa: ghe jera de’e tołe senpre łonghe; me pare el ga tirà fora on saładèo, on schissotèo e on fiascheto de vin bon. Dopo mezodì a ghemo fato on giro par Padoa; fora da na cesa, drento par chealtra: a no ghea pì ganbe. A ła sera a semo

‘ndà a dormire al seminario: camaroni co do fiłe de łeti, stramassi de grena, ma sensa nissoli. Però se stava on ben de Dio, có penso che a casa a dormimo in te i scartossi! Ma voto sentire l’ùltima? Pensa che i fa i so bisogni in casa, e po’ i dise che i xe neti! Sti vargognosi, mi no go bu gnanca el corajo de ‘ndarghe anca mi, parché a me vergognava. Manco małe che a ła matina drio a semo partii de bonora, cussì a me go tegnù fin a casa, che de boto a me s-ciopava la panza! Mi a gheva sercà anca, ma no so’ stà bon de catare on buseto: no te digo ła tribołasion! Dito che mi a gavaria el corajo de fare sporco in casa? Mai al mondo! Semo senpre stà ‘bituà cussì e seto quanto mèjo che se sta a l’aria verta, netarse co na brancà de erbeta, i profumi i se perde.

Có penso che i faséa ła fiła!

Te ghè capio, Toni, se te càpita ‘ndare a Padoa serca senpre de svodarte ben prima de partire, senò te vòi che te capita come mi (robe de l’altro mondo).

Ma mi a far ste robe in casa proprio no le me va xo. Te go avisà, sta’ ‘tento! Mi, sti Padoani, a sò che i xe de i bei onti e i dovaria vergognarse e basta! No digo altro, senò vien fora calcossa de peso!“

– El to amigo dal monte Bortołeto Barutołe.

Ogni riferimento el xe casuale, visto che’l xe capità chel’altro sècoło (1800)

Pietro Gattolin