Fen de majo (fieno di maggio) di Gattolin

MASSENGO,FEN DE MAJO

Na volta, tuti chi che gheva on tocheto de tera el gheva anca la stala co on paro de vachete e la preocupassion la jera de rancurare el fen par mantegnerle.

L’erba drio i fossi su i àrsari de i canali, soto le vigne, se rancurava tuto e anca se somenava de i prà de massengo!

“In majo el primo tajo”, se disea.

Có te passavi vissin a’e case de canpagna te sentivi bàtare; sentà a l’onbra i se meteva a bàtare el fero da segare so la pianta de fero, e po se meteva el coaro taca a la sengia (coaro, on corno cavo de vaca par métarghe drento la piera da uare) e i tacava a segare l’erba.

On lavoro de i pi fadigosi, ma se sa, viva Dio, che bisognava farlo, e noantri putèi co on tòco de baston a ponta a vèrsare le marèe parché el se secasse, e dopo a se faséa i muci ch’i stava in te i canpi arquanti dì.

Dopo, co do angoni i se inpirava soto el mucio e, uno davanti e uno dedrìo, i se portava a casa.

So on canton de la corte ghe jera i pajari e se faséa anca le frigne de fen, (on palo piantà par tera e tuto intorno se sistemava el fen, maman che se ‘ndava sù, la se sistemava a cùpola, parché no passesse la piova.

L’inzegno no mancava, la esperiensa del contadin no mancava, có se viveva in fameja le tradission le se tramandava, e i veci siben che no i gheva pension come adesso i moriva so ‘l so leto. ‘Desso, siben che più o meno tuti i ga la so pension, i va squasi tuti a la casa de ricòvaro: mi la ciamo l’anticàmara de la morte, ma cossa se poe dire?

Le spose de ‘desso se sa che i veci i ghe fa fastidio.

Le fa- meje de na volta romai le xe come le mosche bianche.

Có jera putèo mi, in tute le corte ghe jera na snuvolà de toseti, e tuti i se dava da fare par tuto quelo che ghe jera de bisogno par na gran fameja.

Ma se sa che oncò xe ‘ndà persa anca la benevolensa, el rispeto par i ansiani, na grassia che i vaga a catarli na volta ogni tanto par salvare la facia.

E pensare che có more on vecio a more on archivio de sapiensa!

La gioventù, no ghe ne parlemo: par lori a pare che ghe sia tuto dovesto, i ga catà tuto pronto sensa fare fadiga, e quei che i ga na

s-cianta de bon senso i xe pocheti.

El tenpo de tajare el fen, tajare el formento, rancurare quelo che la tera avara la te daséa, tuto par tirare avanti, alora la miseria la jera veramente granda; ghe jera de le zone so la Bassa che se moriva da la peagra, na malatìa come la peste par mancansa de proteine (se dise adesso), ma alora la jera la malatìa de i poareti, che la carne no i saeva gnanca ‘dove che i la vendesse.

De le volte a me digo:

“Come a ghemo podesto a sopravìvare co tute le carestie, le malatìe, epidemìe, quando la media de la vita la jera so i 50 ani, (e no parlo de un sècolo fa, ma del 1930) pensè cossa chel poe èssare stà i sècoli pi indrìo!

Ma la mentalità de ‘desso, se i vede on poareto, i serca de schivarlo parché el fa fastidio, e xe proprio vero che chi ga la pansa piena no crede a chi che trìbola, ma par noantri che ben o male a ghe semo passà per quei tempi a ne pare inpossibile che ghe sia tanto cinismo in giro.

E se calcun el lesesse ste quatro righe el se mete a rìdare, el ringrassia el Signore de èssare nato in te sto tenpo, parché no sò se’l gavarìa bu la nostra stessa costansa.

Pietro Gatolin ( dalla rivista Quatro Ciàcoe)

Info sul poeta https://www.ossicella.it/il-poeta-pietro-gattolin/

Vedi anche:

Per news su Monselice https://www.ossicella.it/

Per arte e architettura https://www.ossicella.it/monselice/

Per storia di Monselice https://www.monseliceantica.it/

Info e segnalazioni scrivimi qui flaviano.rossetto@ossicella.it

I miei libri [ Clicca qui…]